Aadaan saba Oromoo kun kam jedheen ibsaa?
Kan har’aas yoo ta’e kan darbe seenaasaa,
Akka hin qoranne hin qabu carraasaa,
Carraa mirga-uumaa kan hundeen bilisaa,
Kan dhukkamsee jiru sirni aadaa cunqursaa,
Yaa qomoo Oromoo mee seenaa dhageessaa?
Aadaa jedhuu laataa kan jechaa fi makmaaksa?
“Kan seerri hin adaabne abjuu hirriba keessaa”,
“Kan hin filaatamne gammachuu fi gaddisaa”,
“Kan jiruu fi jireenyaa kan guyyaa halkaansaa”,
“Kan nama wareersuu yoo ta’e rakkisaa”
“kan hawwaan yoo ta’e uggum buraaqnisaa”,
“Gaafa du’an qofa kan ta’e dhumnisaa”
Abjuu mirga-uumaan waan aadaan odeesaa,
Yaa Ayyaantuu Oromoo mee ibsi hiikasaa!
Aadaa siidaan ibsu kan jechaa fi makmaaksa,
“Abjuu soodaataniif eenyuu hirriba dhiisaa?”
“Abjuun hawwii argauu kan hundeen beekkumsa”,
Beekaan male hawwuun hinjiru uumaansaa,
Kan boruu fi hegeree kan darbe seenaansaa,
Abjuun seera uumaa ta’uusaa nuuf ibsa,
“Seera-uumaaf safuu du’aatu abjuu dhoksa”,
Kan abjuu soodate abjuu aadaa bilisaa,
Sirna aadaa diinaan haa rafu hirribasaa,
Aadaan kan hiyyuumaa lammii yoom raffisaa,
Abjuu-hawwiin ibsa kan na dhowwe ciisa,
Abjuudhaan kan argan maaliitu dhugoomsaa?
 
Badhadhiina male rakkoo kan hinqabne,
Abjuu kan ijoollen isa hegereef hawwiine,
Abjuu kan dargaggoon har’aaf waan abdanne,
Kan boruus murteessaa akka hin irraanfanne,
Abjuu kan qondaalaan faacha yoo muranne,
Kolba kan gafarsaa kan leencaa otoon jenne,
Bokkuu kan araaraa geraarsaan dhaaddanne,
Abjuun harmee Oromoo sabbanni akka cinne,
Diinaa-halagaa malee lammiin akka hindhiigne,
Caggiinoon kan diinaa qomootti akka hinroobne,
Firaa fi obboolaa diina irra gargar baafnee,
Abjuu luba Oromoon kan roobe caamsannee,
Walabdee kan lammii haasaan yoo hiikkanne,
Daandii Bilisummaa waltaanee yoo demne,
Abjuun yoos dhugoomtii dhugaa yoo dubbanne,
Hiika abjuu ayyaantuu lammiin qalbeeffannee?
 
Abjuu Bilisummaa kan halkan kaleessaa,
Aadaa saba Oromoof gootatu weeddissa,
Weedduu kan jaalalaa kan magaallee leensaa,
Hirriba keessallee misooma-she faarsaa,
Gaaffiin saba Oromoo wayee hedduu kaasa,
Misooma kan uumaa kan hundee fi kuusaa,
Aadaa eenyummaatti diinno silaa ni qoosa,
Lammiin yaadnu malee eenyu nuu misoomsaa?
 
“Abjuu aadaa-uumaa dhugaatu misoomsaa”,
Kan afaan Oromoo jechaa fi makmaaksa,
Akka baati waggaa taarreeseetan marsaa,
Misooma eenyummaa faakkeenya nan ibsa!
 
“Siddisee Amajjii iftuu akka qorsaa”,
Aadaa saba Oromoo hubaadhaa seenaasaa,
Safuusaa eeggaatee dhugaa iftuuf tumsa,
Kan safuusaa cabsee cubbuu kan abaarsaa,
Beekkumsa kan aadaan hayyuusaatu gorsaa,
Lammii qalbeeffadhaa jechaa fi makmaaksa,
Aadaa garboomfataa kan ta’e hundeensaa,
“Eenyuunuu hin midhagsuu kafanni ergiisaa”,
“Soobni dhugaa hinta’uu buuleetu fokkissaa”,
“Kan nama xiinneessu oduu-sobaa dhiisaa”!
 
Aadaan saba Oromoo gurmuu guddinsaa,
Kan darbee seenaansaa kan boruu nuu ibsa,
Kan hin filaatamne uumaadha hundeensaa,
Kan wajjiin dhalataan dhiiga onne keessaa,
Lubbuu sabboonummaa hundee fi utubaasaa,
Diina kan dhukubsuu lammiif qoorrichi isa,
Diinni kan tuufatu qomootu miidhagsaa,
Miidhaagni kan aadaa maalsaatu beeksiisaa?
Gaaffiwwan akkanaaf hedduudha deebiinsaa,
Lammii itti yaadaa lakkoofsaan tarreessaa,
Kan ijoollumma fi kan galgala keessaa,
Kan boruu fi hegeree kan darbe seenaasaa,
Faakkeenyaaf hubaadha jechaa fi makmaaksa,
“Qomoo kan baarechuu diina maaf dhukkuubsaa?”
“Lammiin waliin boonee diinasaa kotteessa”,
“Lammiin waliin booyee diinasaa boossiisa”,
“Lammiin waliif tumsee diinasaa waareersa”.
 
“Baati Guraandhala uggum yaa ongeesaa”,
Sirna aadaa rakkoo maalsaatan odeessaa?
Dhukkuba isa laphee eela kan cunqursaa,
Yoo jaabaatan malee hundee nama gogsa!
 
“Xoosanyii biqiltuu kiicchuu Bitootessa”,
Kan aadaa midheessu afaantu murteessa,
Galaan inni har’aa kan hegereef kuusaa,
Afaan aadaa Oromoo kan jechaa fi makmaaksa,
Yaa lammii hubaadhaa itti yaadaa hiikasaa,
Xinxala kan seenaa kan dhaamsaa fi gorsaa,
“Amolee abbaan tuffaate ormi hawwa goomjisaa”,
“Mataa abbaan cabsee ormi yoom guddisaa?”,
“Dhanga orma nyaatuus kan lammii si qubsaa”,
“Diinni kan ajjese lammiituu kaafansisaa”
“Kan lammiin kaafane hin badu awwaliisaa”,
Hubaadha kaanafu gorsa jecha-makmaaksaa,
“Kan Ormaa abdaachuun abbaatu of xinneessa”!
 
“Hora danballi’ee yaa galaana Caamsaa”,
Aadaan Oromummaa kan hidda bekkumsaa,
Jiruu fi jireenya kan jechaa fi makmaaksaa,
Diinni gogsuu yalaa maddaa fi burqaasaa,
Erga bara dheeraa konye’een nu dhobaasa,
Yaa diinaa dhageessaa abjuukoon siif ibsa,
Aadaan saba Oromoo ball’aadha hundeensaa,
Warra konye’een dhugnuuf gaaftokko mirgiisaa,
Gaafa nuuf mirgiise akka rooba caamsaa,
Abjuu guyyaa argan uggum yaa lolaasaa,
Tasa sirra bayee haallayyaa si buusa!
 
“Yaa goobana Ebla caggiinoo nuu roobsaa?”,
Kan halkan caggiinoo bariitu fixeensa,
Fixeensii yoo qorree waan kicchuu balleessa,
Aadaan kan nafxaanyaa uggum yaa qorrasaa,
Isa kicchuu gogsu akka cubbuu fi abaarsaa,
Aadaan saba Oromoo hundeen abdii fi obsa,
Bokkaa birraa roobu isa goge maagarsaa,
Diini duruu diinaa lammiin walii obsaa!
 
Aadaa uumaa-nama maaliitu falleessaa?
“Biifa Waxabajjii sora Adoolessa”,
Dararaa luuccessee kan dorroobe jigsaa,
Gaafa cabbii roobe hundee odaa buqqisaa,
Yaa afuura diinaa uggum yaa buubbeesaa,
Kan safuu hineeganne cubbuu fi abaarsa,
Arraba kan fardaa qooq’in laaffiinsaa,
Dhugaan otoo jiruu waan sobaa odeessa,
Fira nuu fakkaatee waan gadhee nu gorsa,
Biifaa fi sora diinaa hubaadhaa dhumaasaa,
Kan diina hintaane lammiitu waldhiigsa!
 
“Galaana Hagayyaa daaktuutu ceesiisaa”,
Aadaan kan araaraa bokkuu fi irreessaa,
Aaraarii kan lammii  diina soodachisa,
Biifaa fi sora diina ni beekna seenaasaa,
Lammiin yoo wal-nyaattu isa gamachuunsaa,
Yaa hayyuu Oromoo qondaala mee gorsaa!
Qomoon walajjeese gumaan walaraarsaa!
 
“Coqoorsa Fulbaanaan harkuun nuu mirgiisaa”,
Aadaan kan hormaataa isa hegereef kuusaa,
Aadaa Bunaqalaa bishaan seetee baqsaa,
Dhageessaa yaa diinaa abjuukoon siif ibsa,
Akka malee nyaatte amma si albasaa,
Dhageessaa yaa lammii qomootu walgorsaa,
Qomoon hin walalu akkatti nyaatasaa,
Dhangaa aadaa Oromoon humna nuu jabeessaa.
 
“Keelloon kan daraartu baati Onkololessa”,
Siida Oromummaa kan galmaaf irreessaa,
Keelloo ayyaana waggaaf maaliini ibsaansaa,
Hanxaaxii urgooftuu kusaayee fi ejeersa,
Kan ittin hidhaamtu quncee kan daanisaa,
Hidda feetti yookaan icchiilbee fi gafarsaa,
Irkiisaan abbayyii laaftoo fi bakkaaniisa,
Jaabataan abbayyii laaftoo isa furdaasaa,
Qasamee dhabatuu dirree gubaleessa,
Ibsaa keelloo-guubaa hayyuutu qabsiisaa,
Bokkaan bara dhaamse ummarra daarasaa,
Bara sana quufa waan hundaatu mirgiisa,
Yaa lammii hubaadhaa jechaa fi makmaaksa,
Rakkoo saba Oromoo jecha aadaan ibsa,
Kicchuu waan nu ciiruuf sirni aadaa cunqursaa,
“Ayyaantutu argaa keelloo-gubaalessa”
“Ayyaantutu argaa, keelloo-ayyaana waggaa”
 
“Goola baanen argee kan baatii Sadaasa”,
Aadaa kaayyoo saba kan dukkannaaf ibsaa,
“Buqurii yoo dhugaan kan garbuu Arfaasaa”,
Aadaan kan furmaataa hamilee jabeessa,
Abjuun kan qondaalaa hawwii saba ibsa,
Yaa weeddisa gootaa kan daggala keessaa,
Hawwii sabaa ibsuun hingawu qobaasaa,
Abdii isa boruuf lammiin walii tumsaa,
Akka hawwiin guutuuf dhiiga diinaa robsa!
Abjuu saba Oromoo isatu dhugomsaa!
 
Abjuu aadaan argee ijoollee kolfiituu,
Yaa daraara Keelloo kan kannisa waamtu,
Kannisa kan safaa diina kan iddituu,
Dargaggoo Oromoo akkamiin walaltuu?
Hagayya waan biifeef coqoorsa biqqiltuu,
Lalistuu coqoorsaan dhameessi yoo hortuu,
Ayyaana ijoolleef baqsaan yoo coroortu,
Hiikasaa mee hiimaa kan taboree nyaatu.
 
Abjuu tokkon argee qawweessa dilbataa,
Annannoo maraattee kan siida hormaataa,
Ayeetuu nuu qicci aadde Ayyaantu waataa,
Bultee nuu cafaaqxii wixataa fi kibxata,
Sonboon ciinaa ejeersaa walakkaa dhaabbata,
Anfaaree irkiifti karaa mirgaa fi bitaa,
Dallaa nuu ijaarti manaa fi galma gootaa,
Ayyaana hormaataa goola baana laataa?
 
Goola kan bilisaa maaltu isa qiixxaataa?
Bu’aa hedduu keessaa xinno tuquu laataa?
Kan nagaan dhaalate nagaan nuu guddata,
Kan humna hinqabne lammiisaa abdata,
Lammiin sooda malee aadaasa dhaaddata,
Beekkumsa kan aadaan qabeenyi guddata,
Yoosan sabni Oromoo deega uubbaafata,
Dhukkuba kan laphee eela isa ulfaataa,
Sirna aadaa gadhee saba garboomfataa,
Kufuunsaa hinoluu eenyutu abdii kutaa?
 
Hiika abjuu goola kan Ayyaantu Waataa,
Dhuma kan hinqabne abjuu kan hormaataa,
Booka kan ejeersaa, waatoo fi doddoota,
Okolee qoraasti roobii fi sambata,
Marqaan itti guutte baqsaa ciirriqfata,
Torbii irreessaatti kamisaa fi jimaata,
Biqila qabaattee farsoo isa jikita,
Eebba nu eebbisuuf kan qondaalaa fi gootaa,
Qomoo Oromoo jeette qooqa bareessataa,
Gaaffii yoo gaafattu talacoo maaf raftaa?
Kan sirra bubulee sirna garboomfataa,
Hirriba kan deegaa raftees ni abjoottaa,
Abjuu isa gaarii eebba Ayyaantuu Waataa,
Abjuun hiika tolaa keessaa kan hormaataa,
Lammii eebba fudhu eebba kan furmaataa,
Jeettee yoo calqabduu eela maaf quufataa?
Wareerren dammaqee maal nuun jeette laataa?
 
Walqabadhaa lammiin akka damee coqoorsaa,
Bakkasha mee ta’aa dukkana nuu ibsaa,
Akka qorsa-barii kan Kaayyoo finiinsaa,
Mee urjii nuu ta’aa hundee nu baalliisaa,
Akka Odaa Oromoo damee nu dagaagsaa,
Akka andoodee kormaa boruus nuu laaliisaa,
Akka ejeersa diimaa irree nu jabeessaa,
Laanqisaa fi diigaaluu ofirraatti gogsaa,
Mee akka waleensuu diina nurraa tiiksaa,
Bekkuumsa argaadhaa lammii mee walgorsaa,
Aadaa kan Oromoo hubaadhaa seenaasaa,
Odaan yoo dagaagee lammiisaaf gaadissaa,
Dhangaa qomoo malee kan diinaa sin qoomsaa!
“Kan diina abdaatee gaaraatu kuffiisaa”,
“Kan afaani tufaa kan gaaraa hooqqisaa”
Yaa jechaa Oromoo kun dhaamsa moo gorsaa?
Hiiphoo kan akkanaa maaliini deebiinsaa?
 
Hiiphaka yaa hadhoo gaaffii keettiif deebii,
Hiphoon waan akkanaa aadaaf ibsa dubbii,
Dubbii seenaa darbeef kan hegereef marii,
Uumaadhaaf weeddistii dinbiicceenu barii,
Siida Oromummaa eebba aadaa durii,
Xinxaala hubaadhaa kuusaa fi galaa borii,
Qoonne haa faacaafannu seenaa isa durii,
Kan faacaafatani abdii fi makaarri,
Lammii qalbeeffadhaa jecha Oromoo durii
“Garbuu kan hamatee han dhugu buqqurii”,
“Rufrufoo haa nyaannun yoo asheette ataarri”,
Siddisa eedaanii kan bokokaan looni,
Siddisa hindararee loon hintikfaatani,
Birraan ni baariiti lammii obsi turii!
 
Kaayyoo Oromummaa kan hiddaa fi foonii,
Qomootu tikfataam kan gannu seetanii?
Qilledha taphanaam qille aadaa gannii,
Qille kan taphaataan yoo gita beekanii,
Mariin lammiin malee nutti qoosti diinni,
Siddisa hindararee diina hinabdaatanii,
Bookoka haammaatti loonuu hineedanii,
Mirga uumaa-nama kan qosaa gootani,
Of tuuffachuun mitii midhagnii fi guddiini,
Aadaa kan eenyuummaa of hin tuuffatani,
Ittin kan miidhagaan yoo of misoomsani,
Hiphoo ijoolle mitii hasaa kan qoosaani,
“Lammii hirmi tufaan aadaaf yoo kuufaani”,
Kun dhaamsaa fi gorsa yoo qalbeeffaattani!
 
Hiiphoo seenaa jettee hiiphaka jedhuree?
Hiiroon kan obbolle dhaamsa durba qarree,
Seenaaf nu gaaffaatti lammiin dhageessuree?
Aadaa saba Oromoo eenyu kan gurguree?
Aadaa hingurguraani eenyu haa jennuree?
Diinii nu gurguru yoo qomoon walbaaree,
Lammii doofaa malee kan Waaqni abaree.
 
Dhageessa yaa durbe mee olbaana qarree,
Faaggaakee qabaadhu kiilolee ishe buurree,
Hingiccaatuu gahe allaaduun kan mare,
Allaaduu kan coomman hora dirree raaree,
Battee siifaan dha’aa toora saadi maree,
Suuqata kan aadaa maaltu si mararee?
Keenna kan jaalalaa keelloo saardoon maree,
Akka aadaa Oromoo booqquukoo siif mare,
Ijaan na waakkaataa lappheekeen mararee?,
Sirbi na dhungaadhu eenyuun soodataree?,
Ga’eelli  bilisaa lammiin yoo nuuf baree!
 
Farsoo ayyaana waggaa buqquriin areree,
Eebuuf dhugna seenaa lammiin walafeerree,
Kan eeboone beekna seenaa aadaa burree,
Kan jiruu fi jiireenyaa lammii akkas turee!
Aadaa uumaa keenya kan diini jiijjiree,
Kan gaddaa fi eelaa kamsaa himaannaaree?
Qarree mee haaddadhuu aadaa isa ture,
Suubboon abdii hinkutuu eenyu si mararee?
 
Erga atuu jeette koottu gama qarree,
Ofiiyuu argiitaa kan anaan maraare,
Jaalala kan uumaa qeerroo isa gasharee,
Keelloo na hiixatee keelloo kan dararee,
Lappheekoo fudhate suubboon kanaaf aaree!
 
Dhageessa yaa suubboo seenaa durba qarree,
Aadaasheef filattee qerroo isa gasharee,
Aadaa kan eenyummaa kan doofaan gurguree,
Mee waayela taa’ii fuudhi guundoo booree!
 
Erga guba ganniif farsoon nuu areree,
Warra hiiyoole gatan Oromoottan aaree,
Dhiicchisa kan gootaa diinni nuu sirbaree?
Maalaatoo Oromummaa isatoo takalee,
Aadaan saba Oromoo ball’aadha guraamale,
Sirba aadaa Oromoo haa sirbinu ijoollee,
Sirba kan tufaatu  kan aadaa wallaallee,
Lammiin haa ibsinuuf sirritti xinxaallee.
 
Oromiyaa bahaa maallattoon kan Ituu,
Aadaa odaa Bultuum kan warra Bareentu,
Yaa dalaga noolee ayyaana kan buuftu,
Kan gama Woboraa shaggooyeefa beektu!
Ayyaana dhalatee kan boquun taphaatu,
Aadaa odaa Roobaa kan Arsii beektuu?,
Siida Oromummaan shaamarraan galaantu,
Aalgee kafaanishe dooqa kan kawwaattu,
Eeleellaan fi meetiin akka urjjii iftuu,
Qakee kan garbuumaa har’as kan qufatuu,
Seenaatu ishe guuba harma kan ciirantu,
Himimaan ijjasche akkamiin haa qoortuu?,
Yaa qomoo sosoobi xiqqo haa kolfituu,
Mee sirbiif Karrayuun Gujiin haa tobbatu,
Diinaa qoosaa seete yoo sanjaan qaaramtu,
Aadaa saani tuq’xee morma kan si cituu!
 
Oromiyaa kaaba gama wara hiluu,
Yaa ayyaana Rayya akkaaf jibbe walluu,
Sirna garboomfataa kan aadaa takaalu,
Kan hundeen hiyyummaa isafiiyyuu hintoluu,
Humnaan taanan male lammiin itti buluu,
Qomoo ijoolle Oromo Jarsoo warra hiluu,
Riigaan ulumayii kan ilkaan qulquluu,
Kiilooleewwan Walloo eenyu kan wallaaluu?
Kan odaa Makoodi aadaa saaniif lolu,
Bilisa argachuun gaaftokko hin oolu!
 
Handhuraa Oromiyaa biraan yoo baritee,
Seera odaa Nabeen araarri yoo buute,
Utala gammachuun ayyaanni soorratee,
Dhiichissa tuulamni anfarroo kawwatee,
Kan sirbu Salale shiimala qabatee,
Aadaa isaatu akkana diini tapha seetee,
Kan urjjii laakooftu conqolaattoo ciiftee!
Ulfiina wallaallaan saggoo kan dhaahamte,
Dhaaddano dargaggoo aadaa kan bubulte,
Fira yoom nu ta’aa harma kan nu kutee!
 
Ayyaanni yoo galuu salgii isa hurgufaa,
Aadaan odaa Bisil akka qorsaa ifa,
Shuubissa kan Jimaan gara kibbaa biifaa,
Hiiyyaasee kan Horroon gara dhihaas biifaa,
Macca yoo dhaaddatu dhigaasatu danfaa!
Eeboo isa mirmirse diina saati horfaa,
Siida Oromummaa kan mana hangafaa,
Aadaan odaa Garees bara baaran quufaa,
Dhameessa boobbasee dhadhaa baqsaa biifaa,
Eebba kan Booranaa: “lammiin walitti hafaa”!
Kan lammii boossisu uggum qoosa diinaa,
Maallattoo Oromummaa sirba akkam dhifnaa?,
Kaayyoon keenyi maali, eegaa maaliif duunaa?
 
Aadaan saba Oromoo ball’aadha guramalee,
Siida Oromummaa kan abdii fi hamilee,
Ball’iinni gudd’ina lammiin yoom wallaallee,
Yaa qomoo Oromoo kan sirbaan yoo tolee,
Kuusaa aadaa keenyaan dalaguu wallaallee!
 
Jaataani kan saba yeroo dalaganii,
Lammii wajjiin male qoobaan midhagani,
Aadaan daboo fi jigii dug’da kan baasani,
Dug’da goota Oromoo kan warra dhuumani,
Dalagni kan seenaa gumaa yoo basaani,
Dhangaa aadaa malee eessa dhufa humni,
Dhangaa aadaa Oromoo warri tufaattani,
Mee guumaan haa hafu maaliini guumani?
Dhangaa kan eenyummaa otoo yaadattanii,
Garaan yoo rafamu ijji himmimaanii,
Aadaa saba Oromoo yaa burqaa annaanii,
Shiriin qoorxii guutee yoom dhabame humni!
Kan qoorxiinsaa guutuu dilbii qaba manni,
Lammiin mee hubaadhaa akka on’su diinni!
 
Siida Oromummaa dilbiin kuusaa-humnaa,
Galaa haa naqaanu galaa daandii seenaa,
Laaffisoo kan Ituu daaxaa kan Booranaa,
Garbuu naanoo Bale marqaaf xaxeefanaa,
Marqaa kan Arsii baqsaa cuubne nyaanaa,
Aadaa harmee Oromoof shameeta naqaana,
Shameeta ateetee kan nuu kennu humna,
Humna kurfeessaamee kan koolasu diina,
Siiqee yaa hanxaxii mee nuu ibsi seenaa,
Humni akka kurfaawu maaliin wal-gorsanaa?
Aadaa gadaa malee boruuf maal abdanaa?
Gadaa hundii siru mee guumaata keennaa!
 
Guumata kan aadaan lammiin waliif tumsaa,
Gudayyaan akaahaa Caliiyaa mee baqsaa,
Akaahii fi baqsaan qorii nuu qooressaa,
“Qorii gurra nyaatu nyaata qaaru keessaa”,
Liiban moo Kuttaayee eenytu calleessaa?,
Talila kan Ituun Karraayyuun mee dhubsaa,
Tuma kan Boraanaan taffagaa qolassaa,
Gujiin haa tobbatu haa tiksu diinaasaa,
Ibida kan Rayyaan qoraan jiibat keessaa,
Akaahii kan garbuu qomoon nuu daksiisaa,
Boruuf qorii miti cuukkoo barbaachisa,
Galaan daandii seenaa cuukkoon kan bilisaa,
Baqsaan ta’u malee bishaan ni rammeessaa,
Diinatu nu guusee akka hinnyaane baqsaa,
Mee harkuu elmanna feetu nuu mirgisaa,
Cukkoo kan hegereef har’a haa nyaannu bassoosaa!
 
Ittoon baaduu jedhu mee gargar nuu baasaa,
Galaa yoo naqaataan galaa daandii-bilisaa,
Kan lammii gumaataa kan diinaa nu qomsaa,
Ittoos ta’u baaduu seenaatuu gargar baasaa,
Seenaa aadaa Oromoo kan nu gubu dhiisaa,
Lammiin walqeqqaanaan diinni nutti qoosa,
Qoosaan akka qaba qomoon mee walgorsaa,
Caliiya haa cororsuu Kuttaayee irrabuusaa,
Leeqaan ancooteerraa  nu naqaa dhukaamsaa,
Dhukaamsaan kan Noonnoo haa gubu diinaasaa,
Dhaangaan otoo jiru kan quubsu hawwaasa,
Deega seenaaf safuu daadhima beelessa,
Dhageesuu yaa lammii seenaatu nu gorsaa,
Qummussiin kan Soddoo Bachoof Ollataansaa
Humna diina cabsuu ammichoo huunkuroonsa,
Warqee  warqii caaluun xaanee biyyaa baasa,
Mulmulliin kan Walloo mee Horroo caacabsaa,
Marqaan warra Jimmaa raafuu irra buusaa,
Baqsaa dhibeef miti aadaatu miidheesaa!
Aadaa guraamalee kan kuusaa kaleessaa,
Kan abdannu hegereef galaa nuu guddissaa,
Galaa daandii-seenaaf lammii walii tumsaa!
 
Kaashiin cumboo jedhu beddeedha eeleensaa,
Giixxoo kan cabsataan qomootu biishessaa,
Dhangaan saba Oromoo kan aadaasa ibsaa,
Abjuu-hawwiin ibsee kan na dhowwu ciisa,
Aadaan Oromummaa ball’aadha qorxiinsaa,
Kaa nan beekuun ibsee kan hafeef nan kiisaa,
Yaa hayyuu Oromoo kan hawwan beekkumsaa,
Kuusaa aadaa Oromoo beekaan nu barsisaa!

Gootota Oromoof !